काँग्रेस बागमती प्रदेश सभापतिमा जगदीश्वर नरसिंह केसीको जित सुनिष्चित 

नुवाकोट न्यूज
नुवाकोट न्यूज

२०७८ मंसिर १७, शुक्रबार

जगदीश्वर नरसिंह केसी, नेपाली काँग्रेस, रामचन्द्र पौडेल

नेपाली काँग्रेसको बागमती प्रदेश सभापतिमा जगदीश्वर नरसिंह केसी उम्मेदवार बनेका छन् । नेपाली कांग्रेसका वरिष्ठ नेता रामचन्द्र पौडेल समूहबाट केसी सभापतिमा उठेका छन् । बिहीबारबाट सुरु भएको प्रदेश अधिवेशनका लागि पौडेल समूहले नुवाकोट जिल्लाका पूर्वसभापति केसीलाई सभापतिमा उम्मेदवार बनाउने निर्णय गरेको हो । 
केसीको टिममा मोहन बहादुर बस्नेत र राजेन्द्र प्रसाद बुर्लाकोटी उपसभापतिको उम्मेदवार रहेका छन् भने महामन्त्रीमा माईकल रामचन्द्र अर्याल र कञ्चन चन्द्र बादेको उम्मेदवारी रहेको छ । 

नुवाकोटबाट प्रतिनिधि रहेका सबैजनाले केसीलाई नै मतदान गर्ने बुझिएको छ । नुवाकोटमा २ प्यानल भएर चुनावी प्रतिस्पर्धा भएपनि प्रदेशको चुनावी माहोलमा भने नुवाकोटबाटै छनौटमा परेका उम्मेदवारहरुलाई मतदान गर्ने बुझिएको छ । जसका कारण पनि केसीको जित सुनिचिष्त देखिएको छ ।   
सात वटै प्रदेश कार्यसमितिका लागि उम्मेदवार टुंगो लगाउन पौडेल समूहले बुधबार मात्रै सम्बन्धित प्रदेशका केन्द्रीय सदस्यहरुलाई जिम्मा दिएको थियो । बागमती प्रदेश सभापतिका लागि पौडेल समूहबाट केसीसहित काभ्रेका पूर्वसभापति मधु आचार्य, धादिङका पूर्वसभापति रमेश धमला, काठमाडौं जिल्लाका पूर्व सचिव राजुराज जोशीलगायत आकांक्षी थिए ।
बुधबार साँझ वरिष्ठ नेता पौडेल, पूर्वमहामन्त्री प्रकाशमान सिंह, केन्द्रीय सदस्य अर्जुननरसिंह केसी, गगनकुमार थापा लगायतको बैठकले केसीलाई छनोट गरेको हो । संस्थापन समूहबाट मकवानपुर जिल्ला सभापति इन्द्र बानियाँले उम्मेदवारी घोषणा गरेका छन् भने पूर्वमहामन्त्री कृष्णप्रसाद सिटौलानिकट नेता भीमसेनदास प्रधानले उम्मेदवारी घोषणा गरिसकेका छन् ।
अधिवेशनमा मंसिर १७ गते शुक्रबार मनोनयन दर्ता र १८ गते मतदान हुने निर्वाचनको कार्यतालिका छ ।
नेपाली काँग्रेस बागमती प्रदेशको प्रथम अधिवेशन अन्तर्गत आज शुक्रबार मनोनयन दर्ता हुँदैछ । काँग्रेसको १४ औं महाधिवेशन अन्तर्गत हेटौंडामा बिहीबारबाट सुरु भएको अधिवेशनमा आज शुक्रबार मनोनयन दर्ताको कार्यतालिका रहेको छ ।
मनोनयन दर्ताका लागि बिहान ८ बजेदेखि दिउँसो १ बजेसम्मको समय तोकिएको छ । उक्त समय भित्र प्रदेश समितिका विभिन्न पदका आकांक्षीहरूले मनोनयन पत्र भरेर दर्ता गरिसक्नुपर्ने प्रदेश निर्वाचन समितिले जनाएको छ ।
उम्मेदवारी दर्ता सम्पन्न भए पश्चात उम्मेदवार माथि दावी विरोधको समय भने दिउँसो १ बजेदेखि २ बजेसम्म तोकिएको छ । दावी विरोध परेका उपर दिउँसो ३ बजेसम्ममा निर्वाचन समितिले निर्णय दिइसक्ने जनाइएको छ  ।
निर्वाचन कार्यतालिका अनुसार दिउँसो ३ बजेदेखि ४ बजेसम्म उम्मेदवारको नेपाली वर्णानुक्रम अनुसार प्रारम्भिक नामावली प्रकाशित गर्ने प्रदेश निर्वाचन समिति संयोजक वरिष्ठ अधिवक्ता केशव प्रसाद काफ्लेले जानकारी दिनुभएको छ । 
उहाँका अनुसार उम्मेदवारी फिर्ता लिने समय भने साँझ ४ बजेदेखि ५ बजेसम्म तोकिएको छ । साँझ ६ बजे उम्मेदवारको अन्तिम नामावली सार्वजनिक गरिने उहाँले बताउनुभएको छ । 
बिहिबार अधिवेशन उद्घाटन कार्यक्रम सम्पन्न भएपछि साँझ  मतदाता नामावली सार्वजनिक गरिएको थियो ।

निर्वाचन अन्तर्गत भोलि मंसिर १८ गते बिहान ९ बजेदेखि मतदान हुनेछ । प्रदेश प्रतिनिधिको रुपमा चुनिएर आएका करिब २ हजार १ सयभन्दा बढीले प्रदेश समिति निर्वाचनमा मतदान गर्नेछन् ।
अधिवेशनबाट प्रदेश सभापति १ जना, उपसभापति २ जना, महामन्त्री २ जना, सहमहामन्त्री ३ जना र ८३ जना सदस्यसहित ९१ जनाको प्रदेश समिति चयन गरिनेछ ।